دو ہزار پانچ کا زلزلہ ذہن میں آج بھی تازہ

تابندہ کوکب گیلانی

وہ اکتوبر دو ہزار پانچ کی ہی ایک دوپہر تھی جب مجھ سے کچھ فاصلے پر میرے بھانجے بھانجیاں کھیلنے میں مصروف تھے۔ایک چھ سالہ بچی دوپٹہ اوڑھے بیٹھی ہے، ایک چار سالہ بچہ آتا ہے اور ایک فرضی دروازے پر دستک دیتا ہے۔ بچی دروازہ کھولتی ہے اور اسے دیکھ کر خوشی سے گلے لگاتی ہے اور کہتی ہے ’میرا بچہ نہیں رہا لیکن شکر ہے بھائی صاحب آپ زندہ ہیں۔‘ بچہ اذیت اور امید بھرے لہجے میں کہتا ہے ’بہن جی میرے بچوں کی کوئی خبر‘؟؟؟

میرے دل کو جیسے کسی نے مٹھی میں لے لیا تھا۔ جو ہوا تھا بھولنا اتنا آسان نہیں تھا جب ایک ہنستی مسکراتی صبح قیامت میں تبدیل ہوگئی تھی۔کشمیر میں آٹھ اکتوبر 2005 کو آنے والے بھیانک زلزلے سے سب سے زیادہ بچے متاثر ہوئے تھے۔ جہاں بڑی تعداد میں بچے اپنے سکولوں میں ہی دفن ہو گئے وہیں بچ جانے والے ننھے دماغوں پرگہرے نقوش ثبت ہو گئے۔ بچوں کے کھیل بھی زلزلے کی ہی کہانیوں کے اردگرد گھومنے لگے۔

ایک قیامت تھی جو آ کر گزر گئی تھی۔ لوگ سکتے کی کیفیت میں تھے۔ یقین آتا بھی تو کیسے؟ نہ کبھی دیکھا نہ سنا۔ یوں بھی کبھی ہوتا ہے کہ آن کی آن میں گاؤں کے گاؤں اور بستیوں کی بستیاں خاک ہو جائیں؟ لینڈ سلائیڈنگ کے باعث راستے معدوم ہو چکے تھے۔ میلوں پیدل دشوار راستوں پر سفر کر کے لوگ اپنے آبائی علاقوں تک جا رہے تھے کہ کسی اپنے کو زندہ سلامت دیکھ سکیں۔

کئی بچے سکولوں کے نام سے گھبرانے لگے۔ خوف کیسے نہ محسوس ہوتا اپنے ہی کئی ہم جماعتوں کو اپنے ارد گرد جس حال میں وہ دیکھ کر آئے تھے ان کے معصوم ذہنوں کے لیے وہ سب ناقابلِ قبول تھا۔

ایک نو عمر لڑکی اپنی ہم جماعت کے اُس پیغام کا بوجھ اٹھائے نڈھال تھی جو اس کے ہمراہ ملبے تلے دبی زندگی کی جستجو کرتے اس نے دیا تھا۔ جس میز پر وہ کتابیں رکھ کر پڑھا کرتی تھی اسی کا ایک کونہ اس کے پیٹ میں پیوست تھا۔ اس نے اپنے آخری پیغام میں اپنی سہیلی سے کہا تھا’ اگر میرے ماں باپ سے ملو تو انہیں بتانا میں بہت اذیت میں مری ہوں۔‘


کئی بچوں کو اس آفت نے وقت سے پہلے بڑا کر دیا ۔

مجھے یاد ہے وہ چودہ سالہ بچی جس کے ماں باپ زلزلے کی نذر ہو گئے اور اس پر پانچ بہن بھائیوں کے ساتھ ضعیف نانی اور دادی دونوں کی ذمہ داری آن پڑی۔ اس کی آنکھوں میں آنسو بھی ہوتے اور کمزور نہ پڑنے کی لگن بھی ہوتی۔

اتنے بڑے پیمانے پر ہلاکتوں کے بعد اچھی خبر کو جیسے کان ترسنے لگے تھے وقت گزرنے کے ساتھ لوگوں کا ایک دوسرے سے حال احوال پوچھنے کا انداز بدلنے لگا ۔ پہلے لوگ ملتے تو پوچھتے زلزلے میں آپ کا کون گیا؟ لیکن اب کوئی شناسا چہرے دکھائی دیتا تو لوگ کہتے شکر ہے آپ زندہ ہیں۔

یہ شاید مثبت زندگی کی طرف پہلا قدم تھا۔ آج آٹھ برس بعد ان علاقوں میں جانے پر شاید ہی اس زلزلے کی کوئی یاد دکھائی دے۔ کیونکہ تعمیرِ نو کے بعد مظفرآباد سمیت کئی علاقے پہلے سے بہتر تعمیر ہو چکے ہیں۔ مگر ایک جگہ شاید آج بھی آٹھ اکتوبر دو ہزار پانچ کا منظر پیش کر رہی ہے وہ ہے اس قدرتی آفت کو جھیلنے والوں کے دل اور دماغ جہاں آج بھی کئی کہانیاں ان کہی ہیں۔

Read More

اتنی سی کہانی۔۔مجھے اب مرنا ہوگا؟

تابندہ کوکب

مظفرآباد میں میرے والدین کے ساڑھے تین مرلے کے گھر میں کوئی صحن نہیں تھا اور اکثر میں کھڑکی سے نظر آنے والے چاند کو دیکھ کر سوچا کرتی تھی کہ کیا کبھی کسی رات کھلے آسمان تلے بھیگی ہوئی گھاس پر لیٹے میں ستاروں سے باتیں کر پاؤں گی۔ لیکن یہ سب یوں بے سروسامانی کی حالت میں ہوگا ایسا تو میرے وہم و گمان میں بھی نہیں تھا۔

آٹھ اکتوبر دو ہزار پانچ کی صبح میں سکول جانے کے لیے بس سٹاپ پر پہنچی تو پوری سڑک چھوٹے چھوٹے کرکٹ گراؤنڈز میں بدلی ہوئی تھی۔ حسبِ معمول نوجوان لڑکے سحری کے بعد کرکٹ کھیل رہے تھے۔ کوئی گاڑی آتی تو کچھ پل کے لیے وِکٹیں سڑک سے اٹھا لی جاتیں۔

میرا سفر شروع ہوا تو دل ایک مرتبہ پھر وسوسوں سے بھر گیا۔ جانے کیوں مجھے کئی دن سے لگ رہا تھا کہ گاڑی اگلا موڑ مڑے گی تو سامنے کوئی حادثہ ہو گا۔ دریا کے ساتھ سفر کرتے مجھے پانی کو دیکھنے سے ڈر لگتا تھا۔ ایک خوف سا تھا کہ یونہی کوئی لاش پانی میں بہتی دکھائی دے جائے گی۔

میں کارکہ نامی گاؤں پہنچی تو روزانہ سکول کے راستے میں ملنے والا بطخوں کا گروہ مجھے آگے جانے ہی نہیں دے رہا تھا کچھ دیر وہاں کھڑے رہنے کے بعد ایک مقامی شخص کی مدد سے آگے بڑھ پائی۔

پہلی کلاس ختم ہونے کو تھی اور میں بچوں کی کاپیاں چیک کر رہی تھی کہ در و دیوار زور دار جھٹکے سے لرز اٹھے۔ میں اس آفت کو سمجھ نہیں پائی سوچا باہر جاکر دوسری ٹیچرز سے پوچھتی ہوں کہ اگر یہ زلزلہ ہے تو بچوں کو باہر نکالیں۔ ابھی ایک قدم ہی اٹھا تھا کہ سامنے کی دیوار پھٹ گئی۔ کئی بچے مجھ سے آکر لپٹ گئے۔ میری چادر اور قمیض سے لپٹے بچے نہ خود دروازے کی طرف بڑھ پا رہے تھے اور نہ میں۔۔۔ پانچ سیکنڈ ۔۔۔۔ ہاں پانچ سیکنڈ ہی کا وقت لگا ہوگا جب میں نے سکول کی دو منزلہ عمارت کو خود پر گرتے دیکھا تھا۔

منہ کہ بل گرے ہوئے میں نے سوچا تھا کہ بس۔۔۔ اتنی سی کہانی۔۔۔ مجھے اب مرنا ہوگا؟ میں نے کلمہ پڑھا تھا یہ مانتے ہوئے کہ میری کہانی ختم ہوگئی۔۔۔ یونہی آسمان کو دیکھنے کی کوشش کی تو وہ دکھائی دے گیا میں نے فوراً اُٹھنے کی کوشش کی تو سارے پتھر میرے اوپر سے ایسے ہٹتے چلے گئے جیسے روئی کے گالے ہوں۔ مجھے نئی زندگی کی نوید مل گئی تھی میں نے اپنے باقی دبے جسم کو کھینچ کر نکالا اور یہ دیکھ کر میں دنگ رہ گئی کہ دو منزلہ عمارت کی اُوپری چھت زمین سے لگی تھی۔

ارد گرد دیکھا تو مٹی اور گرد کی ایک گہری چادر پھیلی ہوئی تھی، پہاڑوں پر کوئی گھر سلامت نہیں تھا۔ میں چیخ رہی تھی کوئی تو آؤ ان بچوں کو نکالو۔ تین کلاسوں کے لگ بھگ سو بچے سکول کی عمارت تلے دبے ہوئے تھے۔ کون آتا؟ سبھی گھروں اور دکانوں تلے دبے تھے جو باہر تھے وہ گھروں سے اپنے پیاروں کو نکالنے میں لگے تھے۔

زلزلے کے جھکٹے رکنے کا نام ہی نہیں لے رہے تھے۔ لوگوں کو سمجھ نہیں آ رہا تھا کہ ملبے تلے دبے اپنے پیاروں کو روئیں یا اپنی موت کے ڈر کو۔۔۔ کتنے اجنبی چہرے تھے مگر سب پر درد اور خوف کا ایک سا رنگ تھا۔ کوئی کہہ رہا تھا ’قیامت آگئی ہے‘۔۔۔ کوئی چِلا رہا تھا کہ ’بھارت نے حملہ کر دیا ہے‘۔ یہ گاؤں لائن آف کنٹرول کے قریب تھا اس لیے اکثریت یہی مان رہی تھی کہ وہاں کوئی بم گرا ہے۔

معلوم نہیں کتنے گھنٹے گزرے تھے مگر یوں لگ رہا تھا کہ گویا صدیاں گزر گئیں ۔ مجھے غصہ آ رہا تھا کہ مظفرآباد سے کوئی آ کیوں نہیں رہا۔ یہاں اتنے لوگ ہلاک ہو گئے ہیں اور وہاں کسی کو احساس تک نہیں۔ پھر میں نے کسی سے کہا کہیں سے ریڈیو لے کر آؤ شاید خبروں میں آ رہا ہو کہ کیا ہوا ہے۔ سبھی ڈھونڈنے لگے مگر منہدم گھروں سے کچھ بھی کیسے ملتا۔

بڑی دیر بعد ایک ہیلی کاپٹر دکھائی دیا تو سب کو امید نظر آنے لگی کہ اب ہمیں بچانے کوئی آ گیا ہے مگر ہیلی کاپٹر لوگوں کی چیخ و پکار کو نظر انداز کرتا واپس چلا گیا۔ مجھے اور بھی غصہ آنے لگا وہ نیچے کیوں نہیں آیا پوچھا کیوں نہیں۔۔۔ میرا دل کسی انہونی کی گواہی دے رہا تھا۔۔۔۔۔ کچھ گھنٹوں کے بعد گرد بیٹھنے لگی تو سامنے پہاڑ پر ایک بہت بڑی لینڈ سلائیڈ سے پورا گاؤں تباہ ہوئے دیکھا تو سب جان گئے کہ یہ آفت صرف ہمارے لیے نہیں ہے۔

دن کے بارہ بجے کے قریب مظفر آباد کی طرف جانے والا ایک شخص جانے کس طرح پیدل واپس وہاں پہنچا۔ سب اس سے پوچھنے لگے مظفرآباد والے کیوں نہیں آ رہے۔ یہاں سب برباد ہوگیا ہے۔وہ شخص دونوں ہاتھ سر پر مارتے ہوئے بیٹھ گیا اور چِلانے لگا’ مظفرآباد تو خود تباہ ہوگیا۔ وہاں کچھ نہیں بچا۔ ہسپتال، سکول، کالج اور ہوٹلز سب غرق ہو گئے۔‘ میں نے اس وقت سب لوگوں کے چہروں پر آخری امید کے ٹوٹنے کا درد دیکھا تھا۔

شام ہوئی تو بارش ہونے لگی۔ تیز بارش اور اچانک ہونے والی سردی نے سبھی کی آنکھوں سے آنسو چھین لیے۔ مسلسل زلزلے کے جھٹکوں میں تیز بارش اور ژالہ باری سب ہی خدا سے رحم اور گناہوں کی معافی مانگ رہے تھے۔ چھ دن اور پانچ راتیں میں نے وہیں مقامی لوگوں کے ساتھ پلاسٹک شیٹوں سے بنے خیموں میں کاٹیں۔ ہر روز جب کسی گھر کے ملبے سے کوئی لاش نکلتی تو کوئی بھاگ کر نہیں جاتا۔ بس پوچھتا کون ملا؟ لوگ شاید تھکنے لگے تھے۔

دو دن میرے پاس بیٹھ کر اپنی نو ماہ کی بچی کو یاد کرنے والی وہ نوجوان لڑکی مجھے آج بھی یاد ہے۔ وہ اپنی بچی کو سُلا کر کام کرنے صحن میں آئی تو زلزلے سے مکان گر گیا۔ اس کی بچی اندر دب گئی۔ تیسرے دن اس نے مجھے آ کر بتایا کہ اس کی بچی مل گئی۔ میں نے بے ساختہ اس سے پوچھا ’کیسی ہے وہ؟‘ اس کا جواب اس کی درد بھری آنکھوں میں پا کر میں اپنے لب بھینچ گئی تھی۔ میرے سکول کی ایک آٹھ سالہ بچی اپنی چھ سالہ بہن کی لاش ملنے پر پھوٹ پھوٹ کر رو رہی تھی اور میرے پاس اس معصوم کو تسلی دینے کے لیے لفظ نہیں تھے۔

چھ دن بعد میرا رابطہ اپنے گھر والوں سے ہوا۔ دل کو کچھ کو تسلی ہوئی۔ مظفرآباد تک جانے والے سڑکیں لینڈ سلائڈ کے باعث ختم ہو گئی تھیں۔ لینڈ سلائڈ سے گزرتے ہوئے سات گھنٹے کا پیدل سفر کرکے میں مظفرآباد پہنچی۔ یہاں دیکھاکہ وہ شہر جہاں مجھے ماں کی آغوش جیسا سکون ملتا تھا اجڑا پڑا تھا۔ میرا چھوٹا بھائی اپنے کئی دوستوں کے ساتھ سکول کی عمارت تلے ابدی نیند سو گیا تھا۔

میں اپنے گھر کی طرف بڑھ رہی تھی، گلیاں اور چوراہے ویران پڑے تھے۔جابجا خون کے دھبے یہاں کسی انہونی کے گزرنے کی داستان سنا رہے تھے۔ دوسرے شہروں سے اپنوں کی تلاش میں آئے ہوئے لوگ ہر چہرے کو اس امید سے دیکھ رہے تھے کہ وہ شاید ان کا رشتہ دار ہو۔

میں اپنے گھر والوں سے جا ملی تھی۔ سمجھ نہیں آ رہا تھا کہ بچ جانے والوں کے لیے خوشی مناؤں یا جانے والوں کا غم۔ کوئی گھرانہ ایسا نہیں تھا جہاں میت نہ آئی ہو۔ میری سہیلی مجھے تسلی دے رہی تھی اور میں اسی کے بھائی کے مرنے پر آنسو بہا رہی تھی۔ ابھی پچھلے آٹھ اکتوبر کو ہی تو ہم اُن کی شادی پر اپنی مرضی کے فنکشن کرنے کی ضد کر رہے تھے۔

آٹھ سال گزر گئے گئے مگر لگتا ہے وہ حادثہ گزرے کچھ پل ہی ہوا ہے۔ اب تو خواہشوں سے بھی ڈر لگتا ہے کہ کہیں کسی خواب کی قیمت کسی درد کی صورت 

میں نہ دینی پڑ جائے۔ ابھی تو آٹھ اکتوبر دو ہزار پانچ کے زخم ہی نہیں بھرے۔

Read More