منہاجیوں کا ہر بات میں سے کرامت تلاش کرنا

جب سے طاہر القادری صاحب کے” کارنامے “بےنقاب ہوئے ہیں تو منہاجی دوستوں نے ایک نئی بات پھیلانا شروع کی ہے کہ”باقی سب باتیں چھوڑو اور یہ دیکھو کہ قادری صاحب سو سے زائد کتب لکھ چکے ہیں“، کچھ جگہ تو یہ تعداد ہزار بتائی جا رہی ہے۔

اور عوام کو گمراہ کرنے کے لیے یہ کہا جا رہا ہے کہ یہ ایک کرامت ہے اتنی زیادہ کتب لکھنا ورنہ یہ کسی انسان کے بس کی بات نہیں (یعنی منہاجی قادری صاحب کو انسان تسلیم نہیں کرتے :) )

بہت سی جگہوں پر لوگوں نے منہاجیوں سے پوچھا کہ ان ہزار کتابوں کو اگر آن لائن فراہم نہیں بھی کر سکتے تو کم از کم ان کے ناموں کی فہرست اور ساتھ یہ کہ کس پبلشر نے اسے شائع کیا ہے ان کے نام ہی فراہم کر دیجیے تا کہ ہم دیکھ سکیں کہ اس میں کونسی کرامت کہاں کہاں چھپی ہوئی ہے۔ ابھی تک تو کسی منہاجی نے یہ ہزار والی لسٹ نہیں فراہم کی۔

منہاجی بھائیو آپ کی اگر پیری کا میعار صرف اتنا ہے کہ یہ شخص سو کتابیں لکھ چکا ہے، اور کوئی دو تین سو خواب سنا چکا ہے تو میں آپ کو اس سے بڑا پیر دکھاتا ہوں۔

جس پیر کا میں ذکر کر رہا ہوں وہ ابھی تک 900 سے زائد بین الاقوامی تحقیقی مقالاجات لکھ چکے ہیں، یاد رکھیں کہ تحقیقی مقالہ کوئی  ”اونگی بونگی“نہیں ہو سکتی اور متعلقہ شعبے کے اعلیٰ ترین پڑھے لکھے لوگ اس کا تفصیلی جائزہ لینے کے بعد شائع کرنے کی اجازت دیتے ہیں، اس جائزے میں نہ صرف زبان، گرائمر اور سٹائل کو دیکھا جاتا ہے بلکہ اس بات کو بخوبی مدنظر رکھا جاتا ہے کہ یہ مقالہ انسانیت کو کوئی فائدہ بھی دے سکتا ہے یا نہیں؟ اور جو چیز اس مقالے میں بیان کی گئی ہے وہ آج سے پہلے کبھی کسی اور نے تو نہیں لکھی اور یہ نئی تحقیق ہے۔ اور ہاں”کاپی پیسٹ“کی تو بالکل بھی گنجائش نہیں ہو سکتی اس میں۔

ان 900 مقالاجات کے ساتھ ساتھ وہ 150 سے زائد مکمل کتب اور 56 کتب کے باب(book chapters) لکھ چکے ہیں ، اور اس کے نام پر 28 پیٹنٹ patent بھی ہیں۔ 
اسے ان  کی کارکردگی پرانھیں  تمغہ امتیاز، ستارہ امتیاز، حلال امتیاز، نشان امتیاز، UNESCO پرائز، اور بہت سے قومی اور بین القوامی ایوارڈ مل چکے ہیں۔

منہاجی بھائی اب آپ کوئی اور دلیل سوچ رہے ہیں، اور جو آپ سوچ رہے ہیں میں اس کا بھی جواب دے دیتا ہوں۔۔ اس شخص نے جس کا میں ذکر کر رہا ہوں طاہر القادری سے کئی گنا زیادہ خطبات اور لیکچر دیے ہیں جن میں قابل ذکر وہ سو سے زائد خطبات ہیں جو وہ بین الاقوامی کانفرنسوں میں دے چکے ہیں اور تقریبا اتنی ہی کانفرنسیں وہ خود بھی منعقد کروا چکے ہیں، ان کے کم از کم 77 (کم از کم اس لیے کہا کہ یہ تعداد پرانی ہے، اب تک بڑھ چکی ہو گی) شاگرد ان کی شاگردی میں ”پی ایچ ڈی“ کر چکے ہیں۔


تو اب بتائیے کیا یہ طاہر القادری سے زیادہ بڑی کرامت نہیں؟؟؟؟
جی ہاں!! ہے تو سہی، تو اب یوں کریں کہ قادری کو چھوڑیں اور اس شخص کو  ”پیر پکڑیں“ 

او ہاں!! یاد آیا میں نے اس پیر کا نام پتا تو بتایا ہی نہیں، اس کا نام ہے ”ڈاکٹر عطا الرحمن“۔  یہ پاکستان کے ایک نامور سائنسدان اور سکالر ہیں۔ کل سے سارے منہاجی پہنچ جائیں ان کے گھر۔

واللہ اعلم بالصواب